திராட்சைக்கொத்து…

(மனம் போன போக்கில்)…

கொஞ்சம் கட்டுரை-க்கலாம்..

அன்புள்ளங்களுக்கு

வணக்கம்.

நாற்பது ஆண்டுகளுக்கு மேலாக மனத்துள் சுழன்றவண்ணம் இருக்கின்றன பல. அவற்றை உங்களோடு பகிர்ந்துகொள்ளவே இப்புதியக் களம். வாரம் ஒரு முறை பகிரப்போகும் இப்பகுதிக்குத் திராட்சைக்கொத்து என்று பெயரிட்டிருக்கிறேன்.

திராட்சைக்கு இரு குணங்கள் உண்டு. புளிப்பும் இனிப்பும். புளிப்பை அப்படியே சாப்பிடுவோரும் உண்டு. ஆனால் புளிப்புத் திராட்சை எப்போதும் திரவ நிலையில் ஜுஸ் ஆக அருந்தச் சுவையாக இருக்கும். உங்களின் எந்தச் சுவையையும் இப் பகுதிக்கான வளர்பிறையாக எடுத்துக் கொள்கிறேன்.

முதல் கொத்தை எதிர்வரும் திங்கள் அன்று தருகிறேன். அடுத்தடுத்த வாரங்களில் அடுத்தடுத்தக் கிழமைகளில் தரலாம் என்கிற எண்ணம் இருக்கிறது. (இந்த வாரம் திங்கள் என்றால் அடுத்த வாரம் செவ் வாய்.. அப்புறம் புதன்.. இப்படியாக)

திங்களன்று சந்திப்போம். என்றும் உங்கள் அன்பிற்காகப் பேரன்புடன் ஹரணி.

வணக்கம்.

 

              கண்ணதாசனின் வசந்த காலங்கள்…

                                     

 

     கண்ணதாசனை ஆசைதீர எல்லோரும் எழுதிப் பார்த்துவிட்டார்கள். அவன் படைப்புகளை ஆராய்ந்து பல பட்டங்கள் பெற்றும் விட்டார்கள். இனி எழுதுவதற்கு என்ன இருக்கிறது என்று எண்ணிப் பார்த்தால் எவர் கிரீன் என்று சொல்வார்களே அப்படி அவனைப் பற்றி எழுதுவதற்கு இருந்துகொண்டேதான் இருக்கின்றன. அவனும் அவன் படைப்புகளை வாசிக்கையில் ஒவ்வொரு முறையும் ஒவ்வொரு அனுபவத்தைக்  கொடுத்துக்கொண்டேதான் இருக்கிறான்.

     ஒரு படைப்பு என்றைக்குப் படைக்கப்பட்டிருந்தாலும் அது புழங்குகிற காலத்துப் பொருத்தத்தையுடையதாக அமைதல் என்பது அந்தப் படைப்பின் அசல் தன்மையையும் திறனையும் அடையாளப்படுத்துவதாகும். கண்ணதாசன் படைப்புகள் பெரும்பான்மையும் அப்படித்தான்.

      அவர் எழுதியுள்ள பல நூல்களில் ஒரு சிறுநூல் ஒரு மணிநேரத்திற்குள் வாசித்து முடித்துவிடக்கூடிய நூல் எனது வசந்த காலங்கள் என்பதாகும். ஒரு மணிநேரத்திற்குள் படித்து முடித்துவிடக்கூடிய திறன் இருந்தாலும் அது ஏற்படுத்தும் உணர்வுகள் ஆண்டுகளைக் கடக்கும் வல்லமை பெற்றவை.

         இந்த வசந்தகாலங்களும் அப்படித்தான். நான் தவற விட்டதை என் வாழ்வில் என்னைக் கடந்துபோனவற்றைத் திரும்ப அனுபவிக்க முடியாமல் அதனை மீட்டெடுக்கும் முயற்சியாக இந்நூலை எழுதுகிறேன் என்கிறான். அவருடைய சுயசரிமை வனவாசம் என்பது எல்லோரும் அறிந்ததுதான். என்றாலும் இந்த நூலைப் பற்றிக் குறிப்பிடும்போது

         வாழ்க்கை எப்படித் துவங்கி, எப்படிப் போய்விட்டது என்பதில் முடிந்தது.

           சொல்லப்போனால் எனது வனவாசத்தைக்கூட இதுதான் நிறைவு செய்யும் என்கிறார்.

         இந்நூலில் எட்டுக்கட்டுரைகள் உள்ளன. எட்டு என்பது ராசியான எண் என்பார்கள். ஒருவேளை இப்படிக் கழித்துவிட்ட வசந்தகாலங்களைத் திரும்பப் பெறமுடியாத நிலையில் எட்டு என்பதை வைத்தாரோ என்று நினைக்கவும் தோனுகிறது. இச்சிறுநூல் உணர்த்தவருவது இன்றைய காலக் கட்டத்திற்கும் பொருந்தும் பலவற்றைப் பேசியிருப்பதுதான். எல்லாவற்றையும் தன் வாழ்வின் அனுபவத்திலிருந்துதான் எடுத்துக் காட்டுகிறார். முதல் மூன்று கட்டுரைகள் தாய்மை குறித்தது. ஒரு தாய்மை எப்படி இருக்கவேண்டும் என்கிறார். தன் பெற்ற தாயையும் தத்துஎடுத்து வளர்த்த தாயையும் குறிப்பிடுகிறார். என்றாலும் நிறைய செய்திகளை இங்கே பதிவு செய்கிறார். தாய் தாலாட்டுப் பாடுவதில் உள்ள பண்பாடு, அவர்கள் பயன்படுத்தும் சொற்களிலுள்ள பண்பாடு என எல்லாவற்றையும் அழகுறப் பதிவுசெய்கிறான்.

        கண்ணதாசனின் சகோதரி மூன்று பிள்ளைகளைப் பெற்று மாண்டபோது பாடிய தாய் வண்ண மக்கள் ஆத்தா உன் வயிறெல்லாம் பிள்ளையல்லோ என்று வருணித்தாளாம். முப்பது வயதில் செத்துவிட்ட அவளைப் பார்த்து ஒப்பாரியிடும்போது அநியாயச் சாவுக்கு அடியெடுத்து வைத்த ஆத்தா என்று பாடினாளாம். ஜனனத்திலும் மரணத்திலும் தாய்மையின் சங்கீதம் பரமனையே மெய்சிலிர்க்க வைக்கிறது என்கிறான். அவர்கள் செய்த கிராமத்து வைத்தியத்தை வீட்டிலே உள்ள அஞ்சறைப்பெட்டி சொல்லும் என்கிறார். சுக்கு, மிளகு, திப்பிலி, இஞ்சி, தைவளை, தூதுவளை, பிரண்டை இப்படியே தாய்மை வளர்த்த ஆரோக்கியம் என்கிறார். பேதி ஆகிறது என்றால் வேவு குடித்தல் என்கிற வைத்தியம். கொதிக்கிற பாலில் எலுமிச்சம் பழத்தைப் பிழிவார்கள். அது திரைந்துபோய் விடும். அதை வடிகட்டி சக்கையை எறிந்துவிட்டுச் சாற்றை மட்டும் அருந்தினால் வயிறு சரியாகிவிடும்.

      வள்ளிக்கிழங்கை மாமிசத்தில் போட்டு சமைத்தால் யாரும் மாமிசத்தைச் சாப்பிடமாட்டார்கள் அதைத்தான் சாப்பிடுவார்கள் என்கிறான். அதிகம் கிழங்கை உண்டுவிட்டால் நாலைந்து பூண்டுகளைச் சுட்டுச் சாப்பிட அதிகாலையில் வாயு முழுவதும் வெளியேறிவிடும் என்கிறான். தாய்மைக்கு நிகர் இந்த உலகில் எதுவும் இல்லை என்கிறான். தன் பிள்ளைகளுக்குப் பெண் பார்க்கும்போதுகூட தாயைவிட்டு மகனைப் பிரிக்காத குடும்பமாகப் பார்க்கவேண்டும் என்று கருதியவன்.பெற்ற தாயின் மடியிலும் வளர்த்த தாயின் நிழலிலும் குடியிருந்த காலங்களே என் வாழ்வின் வசந்தகாலங்கள். வசந்தம் பூமியில் வருஷம் ஒருமுறை வரும். வாழ்வில், ஒரே ஒரு முறைதான் வரும் என்கிறான்.

     கல்லாதான் பெற்ற கருந்தனங்கள் என்னும் கட்டுரையில் வாசிப்பின் எழுதுவதின் சுகத்தை அனுபவிக்கத் தருகிறான். ஒருவனது உள்ளுணர்வில் என்ன தோன்றுகிறதோஅதே வழியில் அவனை விட்டுவிடவேண்டும். வேறு தொழில்களுக்கு அவனைத் திருப்பக்கூடாது என்கிறான்.

       இப்படிக் கூறுகிறான் கேளுங்கள்.

         சொல்லிக்கொடுத்த புத்தியும் கட்டிக்கொடுத்த சோறும் எத்தனை நாளைக்குக் கூடவரும்.

         நுண்ணிய நூல் பல கற்பினும் மற்றும் தன் உண்மை அறியே மிகும் என்றான் வள்ளுவன்..

         ஆட்டுக்கு இலை தழைகள் பிடிக்கும். மாட்டுக்குப் வைக்கோல் புண்ணாக்குப் பிடிக்கும். யானைக்குக் கரும்பு பிடிக்கும். குரங்குக்கு வாழைப்பழம் பிடிக்கும்.

         புண்ணாக்குத் தின்னும்படி குரங்கை வற்புறுத்தக்கூடாது. என்னை எங்கெங்கோ வேலைக்கு அனுப்ப என் பெற்றோர்கள் முயன்றார்கள்.

          அந்த வேலைகளும் கிடைக்கவில்லை. எழுத்தாசையும் என்னை விடவில்லை என்கிறான்.

            தன் வாழ்வின் அனுபவத்தின் அடிப்படையில் பாடல்கள் பிறந்ததை ஆற்றொழுக்கில் சொல்லிப்போகிறான். பைரன் என்னிடத்தில் தோற்றான். அனுபவத்தில் உமர்கய்யாம் என்னிடம் பிச்சை வாங்க வேண்டும். என்று தன் பாடல் புனையும் ஆற்றலைப் பெருமைப்படுத்துகிறான்.

      அதை எழுது இதை எழுது என்று ஏதோ ஒரு தேவதை என்னைப் பிடித்துத் தள்ளும் என்கிறான்.

        உலகத்தை முற்றும் உணர்ந்துகொண்ட பின்னாலேதான் என் எழுத்துகள் பிரகாசிக்கத் தொடங்கின என்கிறான். மெய்யாலும் மனத்தாலும் அனுபவித்தவற்றைப் பகிரும்வேளையே பாடல்களாகக் களங்கொண்டன அவனிடத்தில். மதுவின் சுகமும் அறிவேன். மதுவின் தீமையுமி அறிவேன். என்னைவிடச் சக்தி ஏது இவற்றை அறிவதற்கு என்கிறான்.

          ஒரு காலை சந்தனத்தில் வைத்தால் மறு காலைச் சேற்றில் வைப்பதே என் வாழ்க்கையின் விதி என்றாகிவிட்டது என்கிறான்.

        தலைக்கு மேலே தேவர்கள் பூமாரி பொழிவார்கள். காலுக்குக் கீழே கருநாகங்கள் படையெடுத்துக்கொண்டிருக்கும்.

      என் பக்கத்தில் மனிதர்களும் உட்கார்ந்து கொண்டிருப்பார்கள். பேய்களும் உட்கார்ந்துகொண்டிருக்கும்.

       வசனம் எழுதிக்கொண்டிருப்பேன். விசனம் கதவைத் தட்டிக் கொண்டிருக்கும். நாம் எல்லாரிடத்திலும் அக்கறை செலுத்துகிறோம். நம் வாழ்க்கையில் யார் அக்கறை செலுத்துகிறார்கள்?

      எல்லாரும் நலம் வாழ நான் பாடுவேன்..நான் வாழ யார் பாடுவார்? என்று கேட்கிறான்.

         கோர்ட்டிலே என் பெயர் கூப்பிடாத நாள் கிடையாது.

         ஆனால் பாட்டெழுதுவதற்கு என் வீட்டை முற்றுகையிடாத ஆள்  கிடையாது.

          நதியினில் வெள்ளம். கரையினில் நெருப்பு. இரண்டுக்கும் நடுவே இறைவனின் சிரிப்பு.

          நிம்மதியில்லாமல் எழுதிய பாடல்களையே நீங்கள் நிமிமதியாகக் கேட்டுக் கொண்டிருக்கிறீர்கள் என்றான்.

          பத்துபேர் சொல்லும் புத்திமதியைக் கேட்க வேண்டியவன் பத்துப் பேருக்குப் புத்திசொல்லும் நிலைக்கு வந்தான் என்று அர்த்தமுள்ள இந்து மதம் எழுதிய சூழலைக் குறிப்பிடுகிறான்.

          எனது தென்னை மரங்களில் இன்னும் சில இளநீர்கள் செழிக்கட்டும்.

         எனது நந்தவனத்தில் இன்னும் சில புஷ்பங்கள் மலரட்டும்.

         எனக்கு விளக்குகள் இன்னும் பிரகாசமாக எரியட்டும்.

         எனது சங்கீதம் தாளம் தப்பாமல் எழட்டும்.

         எல்லாம் கண்ணனுக்கே என்கிறான் ஒவ்வொன்றிலும்.

         கண்ணதாசன் என்னும் கவிஞன் இன்னும் கொண்டாடப்படட்டும் நமக்காக. நம் வாழ்வின் வசந்தக் காலங்களைத் தொலைத்துவிடாமல் அனுபவிக்கவும் சேமிக்கவுமாக.

         கண்ணதாசன் பிறந்தநாளான 24.6.21 அன்று எழுதியது.

                          00000         

 ரவா தோசையும் நாக்குப் பதுங்குகுழியும்…

பணி நிமித்தமாக தஞ்சைத் தொடங்கி நாகர்கோயில் வரையில் ஒரு மாவட்டம் விடாமல் எல்லா மாவட்டங்களிலும் தங்கியிருக்கிறேன். சனி. ஞாயிறு இரண்டு நாட்கள்.

இரண்டு நாட்களிலும் உணவு என்பது மாறாதது. காலையில் இட்லி. மதியம் விலை அதிகமுள்ள சாப்பாடு. இரவு மட்டும் ஒரேயொரு ரவா தோசை.

ரவா தோசையைத் தவிர வேறு எதையும் மனது விரும்புவதில்லை.

தஞ்சை நகராட்சிப் பள்ளியில் ஐந்தாவது படிக்கும்போது பள்ளிக்கு எதிரில் அப்பா வேலை பார்த்த மருத்துவமனை. அப்போது கரந்தையில் இருந்த ஓட்டல்கள் இரண்டுதான். ஒன்று ராமைய்யர் ஹோட்டல் மற்றொன்று கணேச பவன்.

அப்படி அடிக்கடி அங்கே ரவாதோசைதான் வாங்கித் தந்து நாக்கை யோகாசனப் பயிற்சிபோல ஆக்கிவிட்டார். அப்பாவை எல்லோருக்கும் தெரியும் என்பதால் (மருத்துவமனையில் பணிபுரிந்ததால். மருந்தாளுநர்) ரவா தோசையில் சிறப்புக் கவனமிருக்கும். தோசையைச் சுற்றி அளவிட்டதுபோல ஒட்டைகள் உடைந்த சோப்புக் குமிழிகளைப்போல இருக்கும். ஒரு ஓட்டைக்கும் இன்னொரு ஓட்டைக்கும் இடைபட்ட பகுதி லேசான சிவப்பில் வெந்திருக்கும். சுற்றுவட்டம் பிளேடுபோல கூர்மை. அதை மடக்கி எடுத்து வரும்போது முருங்கைக்காயைத் துண்டுபோட்டு தோலுரித்தது போலப் படக்கென்று மையப்பகுதி உடைந்து துருத்தி நிற்கும். நெய் வாசனை தூக்கும். சிவப்பு மிளகாய் போட்டு அரைத்த சட்னி சுவையைப் பெருக்கும். பெரும்பான்மைப் பச்சை மிளகாய் சட்னிதான்…அப்புறம் சாம்பார் ஊற்றுவார்கள். அந்த சாம்பாரின் மேல் லேசாக மேகத் திட்டுகளைப் போல ஜீனி தூவுவார் அப்பா..

ஒரு முறை பள்ளி விட்டதும் ரவா தோசை நினைப்பில் எதிரில் மருத்துவமனைக்குப் போய் அப்பாவைப பார்க்க வழிதெரியாமல் அந்த மருத்துவமனை கேட்டைப் பிடித்துக்கொண்டு உறங்கிவிட.. உள்ளே போய் தகவல் சொல்லி அப்பா வந்து என்னடா தம்பி..என்று லேசாய்க் கடிந்துவிட்டு அப்புறம் ரவா தோசை சாப்பிடவைத்து.. (வீட்டில் வந்து அம்மாவிடம் துடை திருகல் வாங்கியது வேறுகதை) வீட்டிற்கு அழைத்து வந்தார்.

இன்று வரை ரவாதோசை நாக்கின் நிழலாக நிற்கிறது. தஞ்சாவூரில் கோல்டன் கபே… ஆரிய பவன்.. ஹோட்டல்கார்த்திக். வெங்கடா லாட்ஜ் காபி பேலஸ் ( காபிபேலசில் மட்டும் சின்ன வெங்காயம் முழுசாப் போட்ட சாம்பார் வாசம் நாக்கைப் பியானோ வாசிக்க வைக்கும்) வசந்த பவன் மங்களாம்பிகா அப்புறம் சின்ன சின்ன உணவுக்கடைகள் இப்படி எல்லாவற்றிலும் ரவாதோசைக்குப் படையெடுத்தக் காலங்கள் போக. தஞ்சைத் தொடங்கி நாகர்கோயில் வரையிலும் இந்த நாக்கு ரவாதோசை வேட்டை யாடியது. . இருப்பினும் தஞ்சையின் ரவாதோசையே நாக்கை அரசாள்கிறது.

பொதுமுடக்கக் காலமாதலால் ரவாதோசை சாப்பிட்டு மாதங்களாகிவிட்டன. பார்சல் என்றாலும் கொரோனா பயம் ரவாதோசையின் ஆசையை நாக்கிற்குக் கீழாகப் பதுங்குகுழியில் பதுங்க வைத்திருக்கிறது.

00000

2Maana Baskaran மற்றும் வடுவூர் சிவ. முரளி

2 கருத்துகள்

விரும்பு

கருத்துத் தெரிவி

பகிர்

2 கருத்துகள்

• செயலில்

  Maana Baskaran

கொஞ்சம் கவிதைகள்…..

ஹரணி

 

யாரேனும் ஒருவர்

விட்டுக் கொடுத்துப் போயிருக்கலாம்

அப்பாவுடன் கூடப்பிறந்தவர்கள்

அப்பாவைப் போலில்லை…

 

அப்பாவிடம் அவர்கள் உதவிபெற்று

உயிர்வாழ்ந்த தருணங்களை ஒருபோதும்

அப்பா அனுபவித்ததேயில்லை…

தன்னிழல்கூட அறியாமல்தான் அப்பா

உறவுகளை நேசித்து வாழ்ந்துபோனவர்

உயிரற்றுப்போன அப்பாவின் முன்னால்

அத்தனைபேரும் விட்டுக்கொடுக்கமுடியாதவர்களாக

இயங்கிக்கொண்டிருந்தார்கள்..

 

முக்கியமான முடிவெடுக்கும் நிலைப்பாடுகளில்

அழக்கூடாதென அப்பா கூறியதை அம்மா

என்றைக்கு மனதிலேந்திகொண்டாளோ

அன்றைக்கு ஏந்திக்கொண்டு வெளியேவந்தாள்

 

அம்மாவை அப்படியொரு அமைதியான

சொற்களில் கண்டதில்லை…

எல்லோரும் நிறுத்திக்கொள்ளுங்கள் இத்துடன்

ஒற்றையடிதான் சொன்னாள்..

புயல் ஓய்ந்த பெருங்கடல்போல அத்தனைபேரும்

அமைதியானார்கள்..

 

 

அவர்களிடம் பேசிய கண்களால் என்னைப்

பார்த்தாள்

நான் அப்பாவைப் பார்த்தேன் அவர் கண்மூடி

ஆமோதிப்பதைபோல மார்பின்மேல் விழுந்த

மாலை அசைந்தது

மாலையை சரிசெய்தேன்

 

அப்பா புறப்பட்டுவிட்டார்

அம்மா விட்டுக்கொடுத்துவிட்டாள்

நான் கொள்ளியை எடுத்துக்கொண்டேன்

மூங்கிலின் வழியாக வெப்பமேறிக் கையைத்

தொட்டது..

 

000

 

குலதெய்வமிருந்த இடம்

பொட்டல் காடாகிக்கிடந்தது..

 

சுற்றிலுமிருந்த வயல்வெளிகள்

அறுவடை கண்ட அயர்ந்துபோய்

கிடந்தன.

 

தினமும் யாரேனும் வழிபாடு

நடத்திக்கொண்டுதான்

இருக்கிறார்கள்..

 

நடுவழியில் கோயிலில் விட்டுவந்த

தண்ணீர் பாட்டில் குறித்து அம்மா

உரக்கக் கத்தினாள்

நடுக்காட்டில எங்க தண்ணி  கெடக்கும்

விட்டுட்டு வந்திட்டிங்க.. என்று

தங்கை அமைதியாகச் சொன்னாள்

விடும்மா

கருப்புசாமிக்கும் தாகம் எடுக்குமில்ல

குடிச்சுக்குவாரென்று..

 

வறண்டவெளியின் ஊடாக வந்த

காற்று குளிர்ந்திருந்தது.

000

சிலவேளைகளில்

மனம் எகிறிவிடுகிறது..

 

எதையேனும் எடுத்து

வன்முறை நிகழ்த்திவிடத் துடித்துவிடுகிறது..

 

இயல்பினை ஒருபோதும் இயல்பற்று

மாற்றிவிட எண்ணாத மனத்தின்

இயல்பு எல்லாவற்றையும்

சமன் செய்கிறது..

 

பெருமழை பெய்கிற நாளில்

கூச்சலிடும் தவளைகளுக்கும்

மழையின் ஈரம் தேவைதான்படுகிறது

என்பதை தவளைகள் அறிவதில்லை..

தவளைகளுக்காக

கத்திகளை உயர்த்துதல் மாண்பன்று

வீரமுமன்று

000

பறவைகளின் எச்சங்கள் விழுந்துகிடக்கும்

நிழல்களில் உறங்கிவிழிக்கிற

தருணங்களில்

கண்களறியா திசையிலிருந்து

பருந்துகளினொலி காதுகளை

வந்தடையும்போது சற்று கலக்கமுறுகிறது

மனதெனினும்

பருந்துகளை எதிர்ப்பது பெரிய செயலில்லை

சிறுசிறு காயங்களோடு அப்புறப்படுத்திவிடலாம்

அவற்றின் ஒலியை அல்லது இருப்பை

என்கிற நம்பிக்கை வலிதானது.,.

காலம் முழுக்க இருத்தலின் தடங்களில்

பருந்துகளின் நிழல்களைத் தவிர்க்கமுடியாது

என்கிற விழிப்புணர்வை

கைக்கொண்டே நடந்தோடவேண்டியிருக்கிறது..

என்றாலும்

எலிகளையும் செத்தபொருட்களையும்

அழுகும் நிணங்களையும் தின்பதான பருந்துகளின்

இயல்பே அவற்றை

மற்றவற்றிலிருந்து ஒதுக்குகிறது

என்பதுவே இருத்தலின்

தடத்தில் அழுத்தமுறக் கால்

பதித்திடவும்… தொடர்ந்தியங்கிடவுமான…

0000

பேருந்துகளிலும்

ரயிலின் பெட்டிகளின் உள்ளும்

கைப்பேசிகளில் குரல்களும்

சொற்களும்

விலங்குகளின் பண்புகளை

உலவ விடுகின்றன

இடையில் கைப்பேசி ஒலித்தால்

எடுக்க மனசஞ்சுகிறது

எந்த விலங்கின் எந்த உறுமலோவென

ஆறுதலேற்றுகிறது

பயணிக்கும் யாரின் குழந்தையின்

சிரிப்பையோ அழுகையையோ

கேட்கிற  நிமிடங்களில்

வாழ்வின் தாகத்தில் விழுகின்றன

சொட்டுக்களாய்…

 

முனைவர் க. அன்பழகன் – ஹரணி

என்னுடைய நூல்கள் தற்போது அமேசானில் உங்களின் பார்வைக்கு. அதற்கான இணைப்பு பின்வருமாறு

 

1.   ஜால்ரா – குறுநாவல்

இணைப்பு –

https://www.amazon.in/%E0%AE%9C%E0%AE%BE%E0%AE%B2%E0%AF%8D%E0%AE%B0%E0%AE%BE-Tamil-%E0%AE%B9%E0%AE%B0%E0%AE%A3%E0%AE%BF-ebook/dp/B094DM4XPD/ref=sr_1_1?dchild=1&keywords=%E0%AE%9C%E0%AE%BE%E0%AE%B2%E0%AF%8D%E0%AE%B0%E0%AE%BE&qid=1620636363&sr=8-1

2.   என்னமோ நடக்குது  (குறுநாவல்)

இணைப்பு.

https://www.amazon.com/%E0%AE%8E%E0%AE%A9%E0%AF%8D%E0%AE%A9%E0%AE%AE%E0%AF%8B-%E0%AE%A8%E0%AE%9F%E0%AE%95%E0%AF%8D%E0%AE%95%E0%AF%81%E0%AE%A4%E0%AF%81-Tamil-%E0%AE%89%E0%AE%A4%E0%AF%8D%E0%AE%B0%E0%AE%BE-ebook/dp/B094G9B5F8/ref=sr_1_1?dchild=1&keywords=%E0%AE%8E%E0%AE%A9%E0%AF%8D%E0%AE%A9%E0%AE%AE%E0%AF%8B+%E0%AE%A8%E0%AE%9F%E0%AE%95%E0%AF%8D%E0%AE%95%E0%AF%81%E0%AE%A4%E0%AF%81&qid=1620636025&sr=8-1

3.   சான்றோர் இளமையியல் (சிறுவர் நூல்)

இணைப்பு.

https://www.amazon.com/%E0%AE%9A%E0%AE%BE%E0%AE%A9%E0%AF%8D%E0%AE%B1%E0%AF%8B%E0%AE%B0%E0%AF%8D-%E0%AE%87%E0%AE%B3%E0%AE%AE%E0%AF%88%E0%AE%AF%E0%AE%BF%E0%AE%AF%E0%AE%B2%E0%AF%8D-Tamil-%E0%AE%B9%E0%AE%B0%E0%AE%A3%E0%AE%BF-ebook/dp/B094F7TQR6/ref=sr_1_1?dchild=1&keywords=%E0%AE%9A%E0%AE%BE%E0%AE%A9%E0%AF%8D%E0%AE%B1%E0%AF%8B%E0%AE%B0%E0%AF%8D+%E0%AE%87%E0%AE%B3%E0%AE%AE%E0%AF%88%E0%AE%AF%E0%AE%BF%E0%AE%AF%E0%AE%B2%E0%AF%8D&qid=1620635868&sr=8-1

4.   நகுதற்பொருட்டே ( நகைச்சுவை கட்டுரைகள் )

இணைப்பு.

https://www.amazon.com/%E0%AE%A8%E0%AE%95%E0%AF%81%E0%AE%A4%E0%AE%B1%E0%AF%8D%E0%AE%AA%E0%AF%8A%E0%AE%B0%E0%AF%81%E0%AE%9F%E0%AF%8D%E0%AE%9F%E0%AF%87-Tamil-%E0%AE%B9%E0%AE%B0%E0%AE%A3%E0%AE%BF-ebook/dp/B094FHHS4D/ref=sr_1_1?dchild=1&keywords=%E0%AE%A8%E0%AE%95%E0%AF%81%E0%AE%A4%E0%AE%B1%E0%AF%8D%E0%AE%AA%E0%AF%8A%E0%AE%B0%E0%AF%81%E0%AE%9F%E0%AF%8D%E0%AE%9F%E0%AF%87&qid=1620635950&sr=8-1

5.   யானையைக் கடித்த பூனை (சிறுவர் கதைகள்)

இணைப்பு.

https://www.amazon.com/dp/B094H38PDH/ref=sr_1_1?dchild=1&keywords=%E0%AE%AF%E0%AE%BE%E0%AE%A9%E0%AF%88%E0%AE%AF%E0%AF%88%E0%AE%95%E0%AF%8D+%E0%AE%95%E0%AE%9F%E0%AE%BF%E0%AE%A4%E0%AF%8D%E0%AE%A4+%E0%AE%AA%E0%AF%82%E0%AE%A9%E0%AF%88&qid=1620636121&sr=8-1